15/6/2016-21/6/2016
做了第二次BRT，開始除菌。我告訴Tanya我未戒到Gluten，她就給我一瓶enzymes（當然要錢）可以幫幫忙，但不要當解藥，遲啲除Gluten就一定要戒清。她本來還給一瓶supplement，詢問後得知是洋蔥素之類，我俾佢睇我食緊的catalog，她就說其實都差不多，但佢那瓶多一些extract，我可食埋自己的才買她的。我覺得幾好，不太commercial，唔會迫買嘢。
本周痕少咗，手臂手腕有局部較痕，不然的話抓幾抓都可以了，不再是抓到非破皮出水不可那種。，18及19/6都有大痕，我思考了幾個原因：(1)食了牛肉；(2)做完BRT的反應；(3)中藥失效。一想到(3)，我極難過。好不容易而家痕少咗，生活冇咁受影響，再痕返又出晒水，我覺得行前三步退後兩步之感。
18/6/2016，我和昕諾去睇過敏科鄔揚源醫生。其實想做敏感測試。昕諾食中藥發到巴巴聲，停了中藥，終於18/6去睇鄔揚源醫生，諗住做敏感測試，但鄔醫生說她發炎中，唔做得住。他為昕諾種菌，睇下有冇因抓損而有菌。又教我們用濕敷方式，先醫好今次中藥過敏，好返先可以做測試。醫生建議我做重金屬測試，因為中藥、一些食品、護膚品都含重金屬。做skin patch test，在背部貼上試貼，48小時後脫下，再24小時後回醫務所睇結果。
21/6，我返去睇結果，帶埋諾諾。她濕敷了三天，好返好多，但是有幾顆像水痘的東西，便問下醫生。醫生說她的不是水痘，而背部也康復，她可以做皮膚測試了。我選了42個items，逐樣計錢的，不過都做開，就做埋啦。結果她只對塵蟎過敏，食物就冇。我自己就對重金屬無過敏。唉。其實都唔知開唔開心，好似搵唔到病因之感。鄔醫生建議可以用防塵蟎的寢具，又話如果諾諾大個啲，可以做舌下脫敏。
我十分迷惘，總覺得找不到出路。我不斷為醫治濕疹找方法，但究竟啲方法有冇成效呢？撇除我自己，單單塵蟎就令諾的濕疹這樣反覆嗎？我總覺得，呢啲skin test，係只搵到一些令人有致命性的或一食即起的過敏源，好似BRT話我Gluten敏感，我食麵食包唔會即刻有事，但可以積積埋埋咪成日濕疹囉？防蟎寢具又買唔買得過？好貴喎！昕善自從15/6沒有用Steriod，停了四日，手腳面都起返，結果又係要塗藥。我唔想俾佢哋用，但唔用的話我又頂唔順佢哋痕、紅，內心很痛苦。
15/7和16/7分別會帶善和諾做BRT check，希望BRT係我們三母女的出路，或者至少是兩個女的出路。
本周有加入了一個telegram的濕疹group，跟一班都有濕疹的年輕人傾談。點解會加入呢？因為在fb的TSW Support Group中，有個香港人留言，談到他用Naturopathy，他說有香港的TSW Group。我好奇想入group，他叫我搵高登，我就成功加入了。從中我得到很大的鼓勵和支持。他們當中有人比我嚴重好多，但態度都比我正面，仲反過來安慰我。我send對鬼手照片出來，他們說我在他們中算輕微。有他們的陪伴，我心情都好咗好多了。
他們當中有幾個睇緊自然療法「自然堂」，有個女仔更加係睇完好返。俾啲相我睇，真係有好大進步。「自然堂」我之前自己上網都search到，都有點心思思，但是都不想貿貿然去，因為babykingdom等forum都冇人講過。估唔到telegram group有真實用家。我都book咗，22/8先有得睇，不過唔緊要，我都想睇定啲，看看group友的康復進度如何。加上如果我一路食中藥和BRT已有幫助，唔駛再到別處求醫更佳！但無論如何，我又覺得多個方法。
沒有留言:
張貼留言