(2)余醫師
睇許醫師一個月左右，我已萌起轉中醫的念頭。有朋友介紹何樹勛醫師，但我嫌地點不方便（因為我是長期作戰的，不能走到天涯海角去睇），於是便再自己找醫師。我google「中醫」「濕疹」，找到一些診所自設的網頁或有醫師自己寫blog講解，討論區上也有一些名字，但我也沒有什麼頭緒。
這時，我又想起浸大的黃霏莉醫師。但2011年睇過黃醫師，之後爛面的事仍猶有餘悸，不過對「浸大」我還是有信心的（始終是大學，也有培訓中醫的學位），而且浸大在尖沙咀有診所，也有代煎藥，咁我出尖沙咀睇、攞藥都方便啲（唔駛過海，慳返啲錢來做醫藥費），所以都係決定睇返「浸大」的中醫。我google到一些報章的報導，睇到浸大的余嘉慧醫師講治療濕疹的個案和方向（應該是浸大中醫開記招來講的），我就諗不如搵余醫師吧。
浸大中醫有個網上預約的專頁，可供預約一個月內的日期。我睇晒余醫師的應診時間、地點，想約尖沙咀下午時間，但整個月都冇期，都說余醫師fully booked，心諗：「嘩，咁難約的嗎？」終於搵到星期一上午余醫師在上環有位了，我check返自己的上課時間表，搵到2016年5月30日的上午我有大量空堂，可以請假去上環睇。5月13日，我book了5月30日去睇余醫師。
食完最後一劑許醫師的中藥，我就期待著見余醫師。但5月30日早上，診所打來話余醫師請病假，我便順延至5月31日，響尖沙咀睇。但5月31日早上，診所打來話醫師都是病假，要延至6月2日才睇。當時我是很失望的，覺得怎麼睇中醫啫，都咁崎嶇，真係出師不利。不過後來諗諗都好，中醫、生物共振都係6月開始睇，6、7、8月，呢三個月，就係我的治病季節，咁易計數啲。
好喇，到咗2016年6月2日，終於去睇余醫師了。之前睇報紙都見過余醫的樣子，幾young，我相信佢未過40歲。不過見佢代表過浸大中醫見報，應該幾受器重。而家啲中醫都好講學歷，學院派的，她是浸大中醫一級榮譽畢業，又是中大針灸碩士，就睇下我同佢有冇緣份啦。
余醫師不多言，但有問有答的。她先問我病史、把脈、看舌。再用電筒睇下我的患處。
我最關心的幾個問題是：
Q：我身體有咩事？
A：脾胃較差，湊BB休息不足，血氣行得唔好。
Q：我會唔會好返？
A：因為好多年來積累了，斷尾就唔得（還是她說「難啲」？我忘了她的用字），但你有恆心食藥係可以控制到。
Q：控制的意思係……
A：範圍無咁大，可能轉天氣都會發。
Q：我有恆心食藥，但要食幾耐，我想有個預算。
A：起碼三個月至半年。
Q：我算嚴重嗎？
A：再嚴重的都有，不過你範圍大，所以比較辛苦。
到今日為止，已睇咗佢四次，佢每次會開六劑藥俾我，我都唔自己煲，由診所煲了。我問過可以用藥粉嗎，想方便啲，她說我現在食煲的會比較好。食多一輪先考慮轉藥粉。佢有時都會同我講吓其他嘢，例如我話我唔想翌日再來拎藥，泊車好貴，佢會同我講下可以泊街呀、泊Miramall都要等位呀。
我真係日日食中藥，食咗10日左右，開始塊面冇咁紅，下巴已沒有好痕好痕抓到出水，最多係少少痕，抓幾抓都停到手。雙手和前臂都仲有痕，但少咗，亦冇咁易出水。耳背耳珠出水都少咗。感覺整體係有改善，我覺得好咗有6至7成。雖然我同時有做生物共振、食supplements，一向夏天我又係會好啲，甚至亦可以說已過了最嚴重的反彈期；不過，直覺上，中藥亦係有幫助的。我會繼續有恆心睇余醫師，好好食藥。希望今年入冬前改善體質，入冬勿發作，唔想再suffer。
沒有留言:
張貼留言