抗戰濕疹，戒類固醇 Week 12

22/6/2016-28/6/2016

本周我吃了不少甜嘢，也許因為這樣，我的面又出現irritation。但最令我困擾的，是雙手臂出了很多像爆了的水痘。這些「痘」不痛的，也不知何時冒出來，總之有時覺得有點唔舒服，望下已經有粒「痘」了。整整一星期，痘越出越多，特別是右手的手肘，難看之餘，也因為始終是有點「損」，伸直手也痛。

我問過 FB 的 TSW Support Group，他們都說是TSW thing。但可幸的是，舊的痘都在結焦中，雖然都有新痘但似乎有點放緩了。

28/6我上了去鄔醫生的醫務所買防塵蟎寢具，順便想睇下有冇機會睇鄔醫生，問吓啲「痘」到底是什麼，但clinic好full所以唔睇了。其實我最驚係有咩怪病或者病毒而誤了診治啫。但28/6睇余醫師，醫師又說似是敏感。

本周睇咗自然療法醫生Christy Ngor，按她指示增加了一些supplements：Trimtox、Prune Juice、Zeoforce、Olvie Leaf。另外也買了過濾氯氣的花灑filter。

抗戰濕疹，戒類固醇 發洩文 TSW Day 84

終於來到12周了。如果我是孕婦，我可以公布喜訊了。但踏入12周，對TSW的我來說，卻是另一個episode。

我的手臂，特別是手肘，自22/6開始，就有出咗幾粒好似破了的水痘的東西，不痛不癢，但就是有個小小的圓形，無端端無咗層表皮，有少少ooze。但是因為在手臂，有時碰到桌面或其他東西，會痛的。「水痘」會結焦，但同時又有新的出現。我不知那些是什麼。上fb的tsw group，其他warriors說是tsw thing，不用擔心。我都唔係好理啦，但係響手肘內側，畢竟是一種損傷，就扯住啲肉，手伸直也痛的。希望唔係咩古怪病，真係tsw thing啦。

我繼續尋找安慰和治療的方向。除了telegram group講的袁醫生，我還對NAET產生興趣，甚至連脊醫、催眠我也想試下。也許會被坑錢，但唔試過又唔係好心息。不過冷靜下來，或者跟人傾談，就都係決定我會繼續中醫 + BRT + supplement，可能等三個月至半年，睇下進展再決定怎樣走下去。

當冷靜時，或同人傾完時，個心係會定啲，會覺得不要再節外生枝。但個人真係好心急，好想善用暑假，控制到病情，用盡每一分每一秒去做治療。除了自己，還有兩個女兒，因為我想像不了九月開學，我怎樣分配時間去自己治療和帶同女兒四出奔走做treatment，所以好想在7月和8月兩個月內，見到成績，咁我先可以安心九月開學，應付忙碌的新學年。就係因為想快，我好想乜都試下，仲有兩個多星期才到諾諾和善善去睇BRT，那這兩星期內我是否可以做其他嘢去幫佢哋呢？例如NAET？例如什麼外用品？

25/6/2016，午餐跟父母和姊妹食buffet，我乜都唔食得，只能食菜和豬肉和白飯；晚上，英國回來的表妹親自下廚宴客，我都係乜都唔食得，只能食白飯和雞翼。其實我唔係好恨食的，只是人人在大快朵頤之際，我卻處處忌口，有點失落。只希望忌口係一段時間，做完BRT脫到敏可以再食返。

昨天去睇咗自然療法醫生Christy Ngor。其實上個月已經在網上search到，不過覺得唔係好想試住，因為都以BRT同中醫為大方向。不過在8/6/2016同一位媽咪通過電話後，說他的兒子做了30次BRT都冇用，後來靠中醫同埋呢個醫生攪掂，我諗咗幾日，6月中或打咗去book，終於昨天去做body check，在Christy介紹下也加多幾款新的supplements。另外也裝了濾氯氣的filter。Supplement我覺得自己都有食開，只是有專人指導下，點樣食得更合適和合份量，所以我又覺得冇衝突的。

總之，我就是心急。如果TSW一年左右自然會好啲，希望中醫可以幫到我9個內控制到，希望加埋BRT，可以縮短時間至7個月，加埋Supplement又縮至6個月，但誰能保證？仲有我的女兒，我又可以點幫佢哋？

善善快半歲了。每次見到家中牆上掛著一張2015年4月時拍的家庭照，心中總有點發緊。那時，我失去了第二個孩子，但一家三口也很快樂。現在有了善善，為何一家四口卻不能像我想像中的快樂？不是善善的問題。朋友對我說，善善出生後，我因為想做一個更好的媽媽，所以要戒類固醇，要改善我的皮膚，繼而去改善女兒的皮膚，我是一個很好的媽媽。現在是經歷一個艱苦的過程，但會過去的。我都好希望可以。明年的夏天，我們可以一家四口好carefree咁去玩嗎？我可以穿起背心、紮起頭髮了嗎？我現在滿臂都是一顆顆的痘，耳珠老在甩皮，又脫髮中，我可以找回以前快樂的生活嗎？

每次我睇到一些TSW Warriors成功的blog / instagram，都會泛起盼望，會有信心自己也能跨得過。我向上主祈求：我讀了那麼多的書，我想好好貢獻社會，教好我的學生，盼我能夠早日康復，重拾教學和工作的熱情和動力；我建立了家庭，有兩個女兒，盼我能夠康復，好好照顧女兒（陪到她們玩，能有力氣和心機為她們報名找小學及幼稚園），也能為女兒找到適合的治癒方法，讓她們有更快樂的童年。

抗戰濕疹，戒類固醇 西醫篇（一）

明明TSW是要戒西藥，為何仍去睇西醫？因為我相信，西醫在類固醇以外，應該還有其他方法的，我想聽聽意見。

(1)   鄔揚源醫生

鄔醫生是過敏科，我在網上見過有人去搵他做皮膚測試過敏源，所以決定自己和諾諾都去做。鄔醫生講解詳細，有問必答。我暫時見咗他兩次，他對我的疑問都有解釋。

18/6/2016，第一次去，講咗我的病史，同埋我TSW的事。他認為我做過浸會醫院的測試，不用再做食物，建議我做重金屬測試。因為中藥中有重金屬，而很多植物，例如綠茶也會有，甚至Multi-vitamin、化妝護膚品都有。於是我在背部做了28種重金屬測試，在背部貼48小時之後撕去，再24小時之後去診所睇結果。

他還跟我講說HKBioTek的驗血測試是呃錢的，因為沒有受監管。我問他我可否驗血check IgE，他說我的身體發緊炎，個指數一定高的了。那我問IgG呢？他說咪就係HKBioTek那種囉。（按：後來我再搵外國forum，有人認為IgG顯示過敏的食物，唔係即時會發作，但係慢性或者有延遲過敏。我也不曾試過戒清呢啲食物，所以我也不敢否定這種test。）

另外，他也解釋濕疹人的皮膚，是本身結構有問題，缺少了一道屏障，令外來物容易刺激皮膚，造成過敏發炎，所以要保濕。而最好的保濕就是凡士林、豬油膏（Emusify Ointment）。

21/6/2016，第二次去。睇咗skin patch test的結果，我沒有過敏。其實有啲失望，我寧願找到一個源頭，仿佛能找到病因，但現在覺得自己病都沒有源由似的。談到TSW，鄔醫生也同意有steriod rebounce和addiction。他說我如果覺得好痕，好辛苦，可以俾Elidel（非類固醇）藥膚我紓緩，或者口服的抗組織胺。我問我會唔好返，佢話會的，不過要長時間。我問多久，他說可以一年、年半甚至再久。因為我皮膚吸收了很多steriod了。我問他，是否我乜藥都唔用都會好返，他俾的藥只是幫我過渡？他說係。另外，他說擔心我腎上腺有影響，寫咗紙俾我去抽血。但我不想再用西藥，ITSAN的人都話要戒就Cold Turkey，連Protopic / Elidel呢啲非類固醇藥都要戒，因為一樣有addicted的。

雖然我從鄔醫生口中得到資訊與自己搜集的相近，但由一個西醫講，我都覺得安心啲。但他強調唔好用植物油護膚，例如椰子油，他說他有些病人用椰子油攪到過敏，以後連椰子都唔食得。我則半信半疑。他支持Vaseline，但又有人話Vaseline封住毛孔。植物油我用的so far又唔覺得有咩問題。

抗戰濕疹，戒類固醇 內服篇（四）

(13)   Enzymes

這是生物共振治療師介紹我食的。因為她說我對Gluten有過敏，要戒口。但生活中實在太多嘢有gluten，儘管我已冇食麵包，出街也不會點pasta，但屋企仲有超級多的麵（我之前諗住方便在學校做lunch，買了勁多，多到如果只係返學日做lunch，都可以食到今年10月），都想清埋佢哋。另外家中仲有麥皮，又要清埋。治療師Tanya說而家食的話都仲得，不過餐前食兩粒enzymes，幫助分解，但千萬不要當解藥，只幫助下。到遲啲除gluten的話一定要戒清了。

(14) Rooibos Tea

這是南非國寶茶，是一個代課同事給我的。她說見到我受濕疹困擾，想幫下我。睇國寶茶的介紹，還有少量網上分享，說是有點功效。我飲過數次，因為飲緊中藥，不想太多相撞。在沒有飲中藥的日子我都有泡來飲。

(15) Gluten-free Pasta

未開始gluten-free的生活，都未雨綢繆啦。Gluten-free只能食白飯、米粉、米線、河粉（總之就是沒有小麥），其實我唔介意，不過上班的日子，我一向用燜燒杯弄蝦子麵、意粉、烏冬等，要戒這些的話，天天只能米粉，會好悶。本來諗住要去citysuper買定啲gluten-free pasta，但朋友介紹可以睇下iherb，我便趁iherb訂滿$313有免費送貨，一口氣訂了大量，又唔駛自己拎，網購多方便！

(16) 大麻籽油

睇嚴浩的偏方集，說大麻籽油（Hemp Oil）比Flaxseed Oil對皮膚更好，於是家裏的Flaxseed Oil食完後，便訂了支Hemp Oil來試。論味道，Hemp Oil草味較重，比較易入口，我也是混進yogurt吃的。

抗戰濕疹，戒類固醇 外用篇（三）

(9)灰錳氧

這是2016年1月睇西醫譚紹棠佢開的，是消炎收水用。我未TSW之前，當面開始痕和出水，敷幾分鐘就有幫助，然後再塗steriod都能頂到幾日。TSW之後，我暫時用過兩次，都是雙手好痕，出水好厲害時用。唔收咗水真係乜都做唔到。但灰錳氧用後會很乾，要注意滋潤。

(10)Jurlique金盞花系列

2016年5月中，TSW 1.5個月時，去Sogo幫同事買護膚品，自己也逛了一下，在Jurlique買了金盞花系列（for sensitive skin）的產品。用了Jurlique一周，那一周明顯塊面係舒服多了，少了痕，也沒出水，紅仍是有點但接近正常。難道我之前用的護膚品真的從來都是錯晒？（特別是Avene，一直以來我都覺得它是適合我的濕疹敏感肌啊！）用了一周Jurlique，我又特地轉回之前的護膚品，看看是否又衰返（我也故意犯賤，因為嚟醫會睇新的中醫，我想個情況差啲去睇，不然，情況好時，人家也不知我可以去到多嚴重）。果然，用返Avene / SK-II / Biotherm / Shiseido / Chanel才三天，我的面已由泛紅發展到一撻撻紅、痕、破皮出水了。不過公道點講，用Jurlique期間，我仍有用Avene的Toner、SK-II的Essence和眼霜、Shiseido的肌底液、Biotherm的Serum，只是沒有用Avene的面霜。所以，元兇Avene的面霜。

(11)平凡媽媽

網上有人話「平凡媽媽」的產品好用，特別是金膏和紫膏對濕疹有幫助，我便買來試試。金膏我覺得不算很顯效，但紫膏真係有助止痕，尤其我腹股溝的濕疹真的塗了就鎮靜了。雖然只屬Relief，不是cure，但它的確幫我渡過不少艱難的時間。諾諾的臉如果發紅，塗了紫膏都有助退紅。

(12)Avene Cicalfate

冬天爆拆的時候，我塗這個是有助加快傷口埋口的。我想，既然爆拆可以用，破皮流水時都可以用呀。而事實證明功效真的不錯。在facebook上的國際tsw support group都有人話好用。

抗戰濕疹，戒類固醇 外用篇（二）

(5) 多美力

在護協見到，寫明是用在接觸性皮炎的，所以我塗在手臂上的異位性皮炎也沒有功用，試過塗咗之後更刺癢。但我相信接觸性皮炎係好的。因為我左手中指早幾星期有甩皮，像主婦手跡象，當時我萬念俱灰，也沒有理會，它似乎有點擴大。之後想，反正都是爛，不如試試多美力，塗了一次，已好轉了，現在已沒有事了。

(6) 愛妥麗

在護協買的，這品牌幾年前在西醫處取過試用裝，我也買過一支來用。網上有些分享說很有效，但於我而言沒有什麼特別。

(7)曼秀雷敦AD Cream

有止痕成分，我的手痕到不得了的時候曾經塗過有點幫助。但google過佢都有抗組織胺的成分，所以如果非必要我都不刻意使用。

(8)中藥浸洗

許醫師在4月尾給我的外洗藥，我因為懶，一直沒有煲，直到6月才煲。一路洗一路痕，痕到我又抓到成手臂都損晒又流水流血。後來我問返余醫師，她問我是否擺咗好耐，我話係。她說中藥響室溫擺得耐會生蟲的。所以我之後沒有再煲，還把餘下的兩包都丟棄了。

抗戰濕疹，戒類固醇 自然療法篇（一）

我認為在香港，西醫是主流，而中醫似乎是在有註冊制度後才漸見規模。而一些長期病患者，都是中西醫都無法幫到，「走投無路」的情況下，會求助於其他療法。我都是在TSW後才認真搵下有冇其他治濕疹的方法，而開始認識、了解一些另類療法。有些療法，我經過資料搜集（都係搵下Forum或者blog），覺得值得試下的。

(1)   生物共振 Bio-resonance Therapy (BRT)

在「親子王國」（Baby Kingdom，下稱bk）比較多呢方面的資料，都是有媽媽的小朋友有嚴重濕疹，經BRT治好了，當中包括「內服篇」中opc-3的「小sin子」。網上打手不少，但憑我多年蒲討論區的經驗，都識得分邊啲係打手邊啲唔係。試過此療法的會員不是很多，我諗十隻手指數得晒。咩原理其實我都唔太明，但總之有人話得的方法，我就想去試下。於是，我就根據bk分享的資料，先其網站睇下，看看病例分享，再打電話去「延康生物共振（Grand Health，下稱GH）」book。

GH的職員問我有沒有介紹人，我說沒有，然後佢話要睇吓治療師幾時有時間先。我見佢話要有介紹人，我就上bk搵返啲用過的媽咪，pm佢哋想佢地做我介紹人，但她們都沒有覆我。翌日，GH就同我約時間了，約咗6月3日上去，做Checking。雖然我是有決心去做，亦抱有信心和期望，但越諗我就越驚，睇bk又唔知啲人做完成效係點。於是又再pm幾個媽咪去問。

我主動approach的會員中，一共收到四個回覆。有三個回覆我話有效，小朋友好返，呢幾年都沒有翻發。小sin子和另一位媽咪May仲whatsapp佢小朋友前後對比的相片給我。小Sin子說，其實她同時做好多樣嘢，佢都唔肯定邊樣係得，不過佢都覺得BRT和opc-3是值得試的。May則打電話俾我，傾咗一陣，說她是用乜都冇效，所以先去試BRT，而做BRT的同時，係冇做其他的治療了，所以肯定是BRT幫到佢個仔。另也有會員pm話BRT係得。第四個媽咪，則告訴我BRT無效，做咗三十次都唔得。她認為BB去做係比較見效的。但係最後係睇中醫睇好，再加埋另一種自然療法，touchwood佢兒子都冇事了。

我都已經有決心去做，無論結果係點，唔試我唔心息。好似一個媽咪同我講，本住俾人呃錢的心態去做會好啲。對，最多俾人呃錢，唉，西醫都呃咗我咁多年了。於是我決心中醫、BRT、食supplements並行去醫治。雖然有人認為我咁樣，到最後都唔知係邊樣幫到我，但我覺得，我要的是結果，不需要知邊樣幫到我。而且，說不定，每樣都幫我10%，咁加加埋埋咪100%囉！

是以，2016年6月3日，我去咗GH度進行第一次checking。

Checking分兩部分。第一部分，係有部機，手掌和腳掌都貼住金屬片，待8分鐘。第二部分，我好舒服地坐在椅上，治療師拎住支長長的金屬匙的物體，有部機響我旁邊，她就拎住件好似印章的東西，在一盤盤的迷你test tube上印，並跟我談話。

攪咗1.5-2小時，治療師Tanya說我有些東西係過敏：Gluten、yeast、egg、milk（少少）。另外，體內有寄生蟲、重金屬、四種真菌，她叫我不要食甜嘢、薯仔、粟米，因為真菌需要糖作養分，我食甜嘢就即係一路去養緊佢哋。So far我只能戒egg、corn、potato。我話屋企仲有好多乳酪要清埋佢，Tanya話我可以食埋，遲啲先同我清真菌。我問是否戒口戒一世，她說：「唔係，啲人來做生物共振都係想過返正常生活。」

另外，身體狀況方面，都係肝唔係幾好，所以排毒唔好。有些脊骨不太好，都會影響到內臟的（所以我都有聽過話脊醫可以治濕疹，因為脊背影響了脾胃等功能，毒便發出來）。

最impressed的是有幾項：（一）她說儀器睇到我右腦唔夠血清，情緒有問題（當時我是很抑鬱的）；（二）她說我由右耳至下身的淋巴唔通，好多毒（我又真係右耳背至下身腹股溝是主要濕疹集中處）；（三）她睇到我左腳有過傷患。

雖然這種儀器測身體及測過敏的形式，跟我過去認識的西醫方法很不一樣，不過我都走投無路，而且有人試過得，我就相信，所以我決定展開療程。我問Tanya我的情況要做幾耐改善，她說九個月至一年。我希望生物共振真係幫到我斷到尾，可以過返正常生活，食到想食的東西（適量地吃吧）。

於是，我就12次療程咁買，$9500 / 12次。我上bk睇過啲家長點樣帶小朋友去做，有人做10次已經好明顯改善，有人做咗19次，有人做咗30-40次。我諗我都係做40次以上那種（年紀大係攪耐啲）。本來我想我做咗有效才帶兩個女去做，但想想，我做半年先見效，到時咪浪費緊女兒的治病時間？而且，醫病呢回事，就算中西醫，都可能睇個醫生夾唔夾；我有用的方法，不代表我女兒冇用，反之亦然。所以，我都決定會帶兩個女去做。但book到7月中先到佢哋了。

暫時我做咗2次BRT。每次過程大約1小時。先吐點口水在棉花或紙巾上，然後手握金屬棒，之後就安坐椅上，治療師會把一塊板在不同時段放在我的腰 / 腹 / 背 / 頭。第一次的治療，是提升我的排毒功能；第二次是開始除菌。Tanya問我有沒有戒口，我說未戒到Gluten。她就說給我一樽enzymes，雖然唔可以當解藥，但如果嗰餐要食有gluten的食物，就食兩粒先。不過遲啲做相關的脫敏就一定要戒清了。

每次完咗療程，都會俾杯水我飲，水沒有特別的氣味，但入面有我的「資料」。另又會給我一片像硬幣狀電池的東西，叫我貼在肚臍下方，貼到下次療程。

暫時只做了兩次，不知道效果如何，始終同時飲緊中藥，又唔肯定何者療效更顯著。不過，我睇bk的分享，做完除菌、脫敏係會排毒，要飲多些水帶毒出去，另外毒也有可能發上皮膚的，所以會痕。做完除菌療程後的三天，我真係覺得療多咗，兩個禮拜冇出現的大痕和多處出水都出現返，唔知是否真的關事？