TSW Month 16 / 1Y4M

寫於2017年8月6日

TSW 16 Month (1 Year 4 Month)

上個月的15m skip 咗冇寫。今日又Update 下我和兩個女兒的情況。

不過在講述近況前，先說一下自己寫呢個blog一年多以來的感受。其實覺得而家用blogspot 寫BLOG 都冇乜人睇了，係寫就用FACEBOOK / IG寫可能多人睇啲，甚至可能有贊助商送我產品落廣告，分分鐘有得賺，而家我呢個blog，其實應該真係冇乜人睇。不過，最近在一啲 whatsapp group中有人說知道我有寫blog，仲話有追我blog，亦說我個blog俾到一啲安慰、意見佢。說實在，我呢個blog係自己發洩用途為主，又唔擺相片（冇圖冇真相吧），自己又唔係話好返晒，都唔係好幫到人吧。而家又懶咗，又冇之前試咁多產品，就算有試，都懶寫產品review（講真嗰句，啲產品其實唔見顯效），呢個blog更加沒有看頭啦。不過我都選擇繼續寫，如果有人剛開始tsw，瘋狂上網搵資料的時候，能夠看到這個blog，那他會知道，tsw這條路，曾經有一個母親帶著兩個女兒一起走過，那種無助、絕望的感覺，那種嚎哭、抑鬱的經歷我也有過，你不孤單。

如果10分是滿分，我會俾自己而家有8.5分了。嗱，不過我的皮膚從來不是白嫩的人，膚色不白，膚質粗糙，即使我自己覺得唔係好乾，但旁人眼看卻覺得我極度乾燥。但在我先天不足下，只要唔紅唔痕，我已經好滿足。左腳腳面和膝後冇乜痕了，手臂手背的紅和印，都幾乎沒有了，當然我的手仍是老人手但我不想再為這個苦惱了。右肩、腹股溝都沒有痕了。面色正常，都係jawline、下巴底會有啲痕同甩皮，但不太礙眼。下巴同頸的皮膚都軟返。頸沒有那麼難看（當然也不是白嫩性感粉頸），這個夏天我可以紮辮了（雖然我沒有紮）。人生最快樂的是有得選擇，我可以選擇紮辮與否，而不是「想紮但唔可以紮」。而這個夏天我也可以穿短袖、甚至無袖了，不像去年那樣，要穿中袖或外套來遮掩手肘的紅皮。

但，左手手掌每天都出小水泡，自7月頭開始，我幾乎每天都要拿利器去把水泡弄破，因為不弄破的話，整整下會好痕，痕到一個點係要狂抓，抓到破皮出水，抓穿水泡，到那個地步就會好痛同埋出水好耐都唔停。所以每每見到有水泡，我就自己拮穿先。手指有時會好痕，特別是洗澡後，但捽一輪會ok的。最令我覺得唔舒服係手肘外側，這個部位，這16個月來，即使最好的時候，都冇全好過，總是有啲紅痕，或者起啲粒粒咁。

雖然不做產品Review了，不過都講下，當我膝後和腳面或頸好痕時，其實我有用在日本買的金色AD（或稱AD20，不貼圖了，相片可自己Google），有啲用。但手肘我用咗金色AD都唔太見效。無奈。

7月時我去了8天日本北海道和4天新加坡，兩個旅行中間只有一天留港，當然比4月那趟日本和台北更頻撲。兩個旅行我都食啲「違禁品」，例如soba、拉麵、雞蛋、雪糕，雖然唔係多食，但在沒有選擇的情況下就食吧。但兩個旅行我反而皮膚好ok，老公都話我響 Hokkaido時的皮膚很好。我想氣候其實對皮膚是有很大的影響的。

想到去年滿是抑鬱，看到陽光燦爛的天空，想著為何我的快樂都沒有了。但今年我可以去旅行了，可以穿短袖了。雖然我仍未太敢戴耳環和化妝，但這都算了。在我的個人層面，能過這種生活，我好滿足的了。

但作為一個母親的層面，我卻立即打入谷底。

大女兒諾諾，7月時滿五歲了。去年她7月的時候，滿手滿腳都是濕疹。今年，她入夏後開始，膝後會出濕疹，但會自己好，不過去咗北海道同新加坡後，似乎嚴重咗；手肘和眼周又有少少，但漸漸好起來。但OVERALL她能穿公主裙參加生日派對，她能穿吊帶裙而皮膚光滑。我可以說她好了95%了。膝後的問題，我本來想帶她去看中醫，但老公總是說不用，讓她自己好。

小女兒善善，7月滿19個月了。她雖然說話不及家姐叻，但她聽得懂大人的指令，亦懂得用單字來表達，走來走去，真的可愛。本來，這個年紀真的很可愛很好玩，我多麼想天天帶她到公園，或者帶她去跟朋友聚會見面，或者就留在家跟她玩唱遊，可是，善善的確令我崩潰。

由2017年2月18日起停用PC計，她TSW 5.5個月了。我自己TSW 5.5個月後，已經恢復了七成（我知我算係好幸運），諾諾TSW 5.5個月後，簡直好返晒。但善善，同樣有做BRT，有睇中醫，有戒口，有用水機2.5 6.0的水和Anespa洗涼，但沒有用。6月尾時曾經好似好啲，可以著短袖衫，唔駛著長襪，但7月後卻完全失控。雙腳紅晒好似燙傷咁，她自己會除襪來抓然後損晒；手踭長期紅和壞皮，又係抓。小臉曾經滑捋捋，但自從7月上旬就開始出返紅的rash / bump。7月23日我未去新加坡，她的臉是滑晒的，但7月29日她開始病，食西藥和抗生素，不知是否因為咁，塊面又起晒一舊舊。這個樣子我真的不知如何帶她外出，穿長袖出街會好熱，但不穿她又抓，索性不出外。但我屈在家看著她沒有進步，甚至退步中，我真的很苦惱，很難過。到底，有沒有一天，她的皮膚能健康的，好好外出玩樂？到底，湊一個健康白滑的BB有幾開心？我好想知道。